૬૯ વર્ષીય બ્રિટિશ દૂધવાળાએ કમસેકમ બે ભારતીય ભાષાઓ, ગુજરાતી અને બંગાળી પર પ્રભુત્વ મેળવ્યું છે, કારણ કે તેના ઘણા ગ્રાહકો અંગ્રેજી બોલી શકતા નથી. જોન ‘જિમી’ માથેરે ૧૯૬૦માં પહેલી વખત દૂધ વેચવાનું શરૂ કર્યું હતું અને ટૂંક સમયમાં તેણે ભારત અને બાંગ્લાદેશથી આવેલા લોકો સાથે મિત્રતા કરી હતી.
વધુ ને વધુ એશિયન પરિવારો અહીં સ્થાયી થવા લાગ્યા હતા, પરંતુ તેઓ થોડું અંગ્રેજી જાણતા હતા અથવા બિલકુલ જાણતા ન હતા. આથી આ બ્રિટિશ દૂધવાળાએ તેઓની ભાષા શીખવાનું શરૂ કર્યું હતું અને ગુજરાતી તથા બંગાળી બોલવા પર પ્રભુત્વ મેળવ્યું હતું. જોને ‘ડેઇલી એક્સપ્રેસ’ને જણાવ્યું હતું, ‘મેં જ્યારે ૧૯૬૦માં શરૂઆત કરી ત્યારે આ પ્રદેશમાં ગણતરીના એશિયન પરિવારો હતા. પહેલાં જે કેટલાક લોકોને હું દૂધ આપવા જતો હતો તેઓને હું આજે પણ યાદ કરી શકું છું. તેઓ સારા, ભદ્ર લોકો હતા, પરંતુ તેઓનું અંગ્રેજી સારું ન હતું. આથી મેં જાતે જ તેઓની ભાષા શીખવા માંડી અને એનાથી પરિસ્થિતિ ઘણી સરળ બની.’
ભારતીય સંસ્કૃતિઓની નિષ્ણાત પ્રોફેસર રાચેલ ડવીયર કહે છે, ‘ઘણા ઓછા બિનભારતીયો ગુજરાતી શીખે છે. મેં ઓમાનમાં કેટલાક આરબ વેપારીઓને ગુજરાતીમાં વાત કરતા સાંભળ્યા હતા અને ગુજરાતી જાણનાર ઓછા વિદ્વાનો છે.’
સ્થાનિક લોકોએ પણ સમર્થન આપ્યું છે કે ગુજરાતી અને બંગાળી ભાષા પરના જોનના પ્રભુત્વને લીધે તેનો ભારતીય સમાજ સાથે અતૂટ સંબંધ બંધાયો છે. જોનને ૧૯૭૪થી ઓળખતા મોહંમદ સૂફી કહે છે, ‘મને યાદ છે કે તે કોઈના ઘરે ગયો હતો અને ઘરની સ્ત્રીને શું જોઈએ છે તે તેણે પૂછ્યું હતું. તેને આટલું સરસ ગુજરાતી બોલતો જોઈને મને આંચકો લાગ્યો હતો.’
માઇગ્રેશન વોચ, યુકેના પ્રવકતા એલ્પ મેહમેતે ઉમેર્યું હતું, ‘પશ્ચિમી દેશની વ્યક્તિ માટે ગુજરાતી શીખવામાં સરળ ભાષા નથી અને આ તો બ્રિટિશ દૂધવાળાની શ્રેષ્ઠ પરંપરા છે, જે તેના ગ્રાહકની સેવા કરતા શ્રેષ્ઠ રસ્તા શોધે છે.’
Source: Agency, London | Last Updated 11:09 AM [IST](14/07/2010)
No comments:
Post a Comment